No post anterior preguntábame cántas páxinas tería blogcensus indexadas como páxinas escritas en portugués cando en realidade son páxinas escritas en galego.
Na sección de descargas desa páxina un pode baixar un arquivo cos datos que manexan.

Despois de baixalo, estiven facendo algunhas comprobacións, e os meus temores víronse confirmados. Para a xente de blogcensus, esta páxina non está escrita en galego, está escrita en portugués.

Pero a cousa non queda aí, facendo un repaso das bitácoras que están apuntadas en blogaliza, descubro que aparecen indexadas en castelán as seguintes páxinas:

• endurance
• Páxina de ock
• ciénaga

e en portugués:

• diantedomar
• O champiñón do gnomo
• pawley
• demares
• redesnegras
• esbardalladas

Así que ese algoritmo deles non funciona ben, xa se comentara en blogaliza que o sistema de blogcensus non recoñecía o galego. O fastidioso é que nos engada a uns á conta de bitácoras en portugués e a outros á conta de bitácoras en castelán.

Hoxe estiven mirando unha páxina chamada blogcensus. Para a xente que ten bitácoras non debe ser nada novo, de feito, xa en blogaliza iarrovawo comentaba os resultados do último censo de bitácoras feito nesta páxina.

É curioso ver cómo cando alguén decide emprender un proxecto coma o de levar un ceso de bitácoras, pasa absolutamente das marcaxes. Na páxina blogcensus din que teñen un algoritmo propio, sen explicar moi ben en qué se basean para decidir que unha páxina está nunha lingua ou noutra. O que si que deixan claro é que non empregan a información dos metadatos nin os atributos que poida xerar un sistema de xestión de contidos…

Pregúntome cántas das páxinas que eles contan en «portugués» están en «galego».

Ascárida está montando un fotoblog colectivo para todos aqueles que desexen participar. Acaba de instalar un foro para que os que se animen deixen guías e tutoriais sobre como retocar imaxes.

Se teño tempo, participarei.

Acabo de pasarme pola web de dr Zippie, porque me acaba de recordar que non son o único que NON usa Movable Type (que non o use non quere dicir que non me pareza bo). :shock: Caramba para o MorcegoCMS. En blogaliza falábase da necesidade de ter programas e documentación en galego. A iniciativa de dr Zippie parece un bo comezo.

Endurance cambiou a url (xa o vira hai tempo, pero son así de preguiceiro) e mudouse a Movable Type. A este paso serei o único que non o use. A cousa boa é que se animou a instalar linux no seu equipo, e con iso abriu tamén o seu propio weblog ProLinux. A ver qué nos conta sobre os seus avances.

Grueiro. Outro weblog visto vía http://demares.ageda.net/. A cousa vai animándose. Veña máis galego na rede.

Hoxe tiña un correo avisándome dun novo blog en galego. Grata sorpresa. Seica imos crecendo. Xa o puxen na miña lista de blogs galegos. Dá gusto comezar ben o día. O blog é de Pawley, e polo que puiden ver é relativamente novo.

Ascarida atopou un novo weblog en galego: o de dr zippie.

Apúntomo para a lista.

Vaia sorpresa :shock:, este home ten o seu CMS (sistema de xestión de contidos) en sourceforge. Chámase morcegocms, e a web do proxecto está en castelán.

Mirando e mirando pola rede atopei unha grata sorpresa para a comunidade blogueira:galizacanibal. Estes días en blogaliza andabamos a ver cómo organiza-la comunidade blogueira galega. A iniciativa de galizacanibal parece unha gran idea. E mesmo usan o drupal, un dos sistemas que estivera probando eu.

Encántame o seu lema: «As novas con sentidiño».

En Blogaliza, state of the art, goretoxo amosa a súa preocupación sobre cómo está a cousa de encher a rede de palabras na nosa lingua…
Fóra de algunhas páxinas institucionais que se redactan en galego, dalgún diario dixital e dalgunhas poucas páxinas máis persoais, o meu «universo» virtual en galego é moi reducido… e pensándoo ben, o «universo» real en galego tamén é ben reducido.

Mellor que pense noutras cousas, o tema pode ser moi deprimente.